 |
| ටොයි සමාජයේ ගැවසුනාට සාමාජිකත්වය ලැබෙන්නේ නැත්තම් ටොයියෙක් නෙවෙයි ෆේක් ටොයියෙක් |
බයියෝ සහ ටෝයියෝ. මට හිතෙන විදිහට මේ රටේ පුළුල් වශයෙන් ඉන්නේ බයියෝ සහ ටොයියෝ නෙවෙයි. ඒ නම් දෙක දේශපාලන භාවිතයට ආවේ 2015 මැතිවරණ සමයේ වුනත් ඒවාට අදාළ සංකල්ප සහ පිරිස් වලට දිග ඉතියාසයක් තියෙනවා. ඒ කියන්නේ මහින්දවාදීන් සහ මහින්ද විරෝධීන්ම නෙවෙයි. බයි-ටොයි කතාව ඊට වඩා සංකීර්ණයි.
'සමහරු හිතාගෙන ඉන්නේ නිදහස කියන්නේ මේ රටේ මිනිස්සු දිනාගත්ත දෙයක් නෙවෙයි, ඒ අයගේ උත්සාහයෙන් පමණක් රටට ලබාගත්ත දෙයක් කියලා. ඒ නිසාම නිදහස කියන්නේ එයාලගේ පුද්ගලික දේපලක් කියල එයාලා හිතනවා. නිදහසේ සියලු වරප්‍රසාද භුක්ති විඳින්න ඕන ප්‍රධාන වශයෙන් එයාලමයි කියලත් හිතනවා. 'ඇස්.ඩබ්.ආර්.ඩී. බණ්ඩාරනායක මෙහෙම කිව්වේ ශ්‍රී ලංකා නිදහස් පක්ෂය ආරම්භ කරපු දවසේ. බයියෝ ටොයියෝ ගැන කතාකරන්න මේ කතාව හොඳ ප්‍රවේශයක් සපයනවා.
ඉන්නේ ටොයියෝ සහ බයියෝ විතරක් නෙවෙයි. ෆේක් ටොයියොත් ඉන්නවා. ෆේක් බයියොත් ඉන්නවා. අමතර කණ්ඩායම් නැතුව නෙවෙයි, ඒත් මේක බයි-ටොයි සාකච්ඡාවකට සීමා කරමු.
ටොයියෝ. පොදුවේ එජාපයේ නැත්තම් එජාප ප්‍රමුඛ සන්ධාන වල ඉන්න අය (මෛත්‍රිපාල ඇතුළුව) හඳුන්වන්න පාවිච්චි කරන නමක්. ඒත් ටොයියෝ කියන්නේ බණ්ඩාරනායක විස්තර කරපු සැට් එක. එයාලගෙන් පැවතෙන් අය. රට පාලනය කිරීම සහ වරප්‍රසාද භුක්ති විඳීම ජන්ම අයිතියක් කියල හිතන අය. මූලික වශයෙන් ඉංග්‍රීසි භාෂාව හසුරුවන සහ එම භාෂාව ඉගෙන ගැනීමේ වරප්‍රශාදය දිනාගන්න ගැතිකම් කල, ආගම දහම පවා වෙනස් කරපු කණ්ඩායමක්. බණ්ඩා එක්ක එයාල මේ තරම් තරහ ඒ 'ජන්ම අයිතිය' උදුරාගත්තේ බණ්ඩා කියල විශ්වාස කරන නිසා. රාජ්‍ය භාෂාව සිංහල කිරීම මේ රටේ සියලු ප්‍රශ්ණ වලට මුලයි කියල එයාල කියන්නේ ඒ නිසා. සිංහල කතා කරපු අය සමූලඝාතනය කරන්න උත්සාහ කරපු එක ගැන එයාලා කතා කරන්නේ නැහැ. එයාලට අනුව එහෙමෙ සිංහල බෞද්ධයින් මැරුවේ නැහැ, පන්සල් විනාශ කෙරුවේ නැහැ, පොත පත ගිනි තිබ්බේ නැහැ. නැහැ වගේ තමයි කටයුතු කරන්නේ. නැහැ වගේ තමයි දේශපාලන ටෝක් ඉෂු කරන්නේ. 'ඉංග්‍රීසි පමණක්' කියල ප්‍රතිපත්තියක් ක්‍රියාත්මක වුන බව එයාල කියන්නේ නැහැ.
කොහොම වුනත්, නිදහසෙන් පසුවත්, රටේ 'සුපිරි' පන්තිය වුනේ මෙයාල. ප්‍රජාතන්ත්‍රවාදය කියන 'කුණුහරුපය' හේතුවෙන් බහුතර බලයක් හදාගන්න අමාරු වුනත්, ඉත්තෙක් ගැත්තෙක් ඉදිරිපත් කරමින් රට පාලනය කරන්න හදන පිරිසක් මෙයාල. ආර්ථික වශයෙන් ද සමාජීය වශයෙන් ද 'සුපිරි' වුනාට එයාල සුළුතරයක්. තමන් ටොයියෝ කියල හඳුන්වාගන්න අය මේ පන්තියට අයිති නැහැ. පන්තියේ සාමාජිකත්වය නෑ, ලැබෙන්නෙත් නෑ. ඒත් කවදා හරි ලැබෙයි කියන බලාපොරොත්තුව නිසා නැත්තම් ලැබුනා කියන මායාව වැළඳගත්ත නිසා තමන් 'ටොයියෝ' කියල හිතනවා. කියාගන්නවා.
ටොයියෝ වුනාට ඇත්තට 'ෆේක්' නිසා ටොයි ගති පැවතුම් අනුකරණය කරනවා. බයියෝ නෙවෙයි කියල ඔප්පු කරන්න බයියන්ට වෛර කරනවා, අපහාස කරනවා. මේ යටත්විජිත මානසිකත්වයේ ප්‍රධාන ලක්ෂණයක්. තමන්ට (නැත්තම් තමන්ගේ 'රියල්' එකට) වෛර කරනවා. කොටින්ම තමන්ට 'තමන්ව' පෙන්නන්න බෑ. ටොයිකම ට ආදරේ කරන්නේ, ටොයිකම සහ ටොයියෝ හොඳයි කියන්නේ, වර්ණනා කරන්නේ ඒ නිසයි.
බයියො ටිකක් වෙනස්. ඒත් බයියන්ගේත් කොටස් දෙකක් තියෙනවා: රියල් බයියෝ සහ ෆේක් බයියෝ. බයියෝ දන්නවා තමන්ට කවදාවත් ටොයියෙක් වෙන්න බැරි බව. මට හිතෙන විදිහට ටොයියෙක් වෙන්න පුළුවන් කමක් තියෙනවා නම් බොහෝ බයියෝ 'එපා' කියන්නේ නෑ. ඒත් ටොයියෙක් වෙන්න ලේසි නැති නිසා ටොයියන්ට ටොයිකමට වෛර කරනවා. අපහාස කරනවා. එහෙම කරන්නේ බයියෝ නෙවෙයි, ෆේක් බයියෝ.
රියල් බයියන්ට ඔය ප්‍රශ්නේ නැහැ. ටොයිකම කියන්නේ පුස්සක් කියලත්, ටොයියෝ කියන්නේ දීර්ග ගැති-ඉතිහාසයක් ඇති පිරිසක් කියලත්, ෆේක් ටොයියන් ලොකු ඇරියස් ලෙඩකින් පෙළෙන බවත් රියල් බයියෝ දන්නවා. ෆේක් බයියන්ටත් ඒ වගේ ඇරියස් ප්‍රශ්ණයක් තියෙන බවත් රියල් බයියෝ දන්නවා. ටොයි සමාජයේ සාමාජිකත්වය දෙන්න හැදුවත් හිනා වෙලා 'එපා මචං' කියන්නේ රියල් බයියෝ.
'බටහිට සුපිරියි මචං' කියල යෝජනා කරද්දී, සුද්දා හිටියනම් හොඳය කියල කියද්දී 'හා මචං' කියන්නේ රියල් බයියෝ. ටොයියොත්, ටොයි කමත් යතාර්ථයක් බව පිළිගන්න අතර ඒවායේ ඇති දෙයක් නැති බව දන්න අය තමයි බයියෝ. රියල් බයියෝ.
ඔබ බයියෙක්ද ටොයියෙක්ද? ෆේක්ද රියල්ද? අකුදි කියනවා වගේ 'කල්පනා කරලා බලන්න!'
0 comments:
Post a Comment